கிருமி

20/08/2012

வாழும் கலை

Filed under: பொது — கிருமி @ 3:00 பிப

அண்மையில் மறைந்த எழுத்தாளர் ரா.கி.ரங்கராஜனின் மொழிபெயர்ப்பு சுயசரிதைகளான பட்டாம்பூச்சி மற்றும் இன்னொரு பட்டாம்பூச்சி ஆகிய இரு நூல்களையும் சென்ற வாரம் வாசித்து முடித்தேன். அதில் ஹென்றி ஷாரியரின் சாகசங்கள் வேறெந்த கதைகளிலும் சுயசரிதைகளிலும் இல்லாத அளவு அமர்க்களமாக இருக்கும். கடலில் ஓட்டை உடைசல்களை வைத்துச் செய்த இற்றுப்போன படகுகள் மூலம் ஆயிரத்து ஐநூறு கல் தூரம் பெரும் கொந்தளிப்பான கடலில் பயணித்து நாடு நாடாக பெரும் ஆபத்துகளின் ஊடே அலையும் சாகசங்கள் நம்ப முடியாத அளவில் இருக்கும்.

இந்த நூல் நான் முதலில் வாசித்த போது சுமார் தொள்ளாயிரத்து ஐம்பது பக்கங்களுக்கு மேல் இருந்தது. தற்போதைய பதிப்பில், சுமார் எண்ணூற்று எழுபது அல்லது எண்பது பக்கங்களுக்குள் தான் இருந்தது. பக்க அளவு, எழுத்துரு அளவு எல்லாம் வித்தியாசப்பட்டதால் இந்த வேறுபாடு போலும்.

பிரெஞ்சு கயானாவின் தீவாந்திர சிறையில் அடைக்கப்பட்ட ஒரு கைதி சிலரைக் கூட்டுச் சேர்ந்து கொண்டு பலமுறை தப்ப முயன்று பிடிபட்டு பல ஆபத்துகளுக்கிடையில் தப்ப முயன்று இறுதியில் வெனிசுலாவில் அடைக்கலம் புகுந்து தப்புவதே இந்த நூலின் சாரமாகும்.

நாயகன் ஹென்றி ஷாரியர் விவரிக்கும் சம்பவங்களின் நம்பகத்தன்மை குறித்து பல விவாதங்கள் நடந்துள்ளன. பெருவாரியான நிகழ்வுகள் பிற கைதிகளின் அனுவங்கள் என்றும் பத்து விழுக்காடு மட்டுமே ஷாரியரின் சொந்த அனுபவங்கள் என்றும் விமர்சனங்கள் உண்டு.

இதைப்படிக்கும் போது ஒன்றை சிந்திக்க வேண்டியிருக்கிறது. ஹென்றி ஷாரியரின் இடத்தில் நம்மைப் பொருத்திப் பார்த்தால்? அப்படி நினைக்கக் கூட இயலாது நம் போன்றவர்களால். இன்றைய நமது பாரதச் சூழலில் வாழும் நம்மால் அப்படி நினைப்பதே கூட மாபெரும் பாதகமாக மனதிற்குப் படும். நாம் தவறுக்காக தண்டிக்கப்பட்டாலும் கூட விதியை எண்ணி நோகவே மனம் துணியும், தப்பத் துணியாது. அப்படி நாம் வாழ்ந்து பழகி வருகிறோம்.

இந்த லட்சணத்தில் பெருங்கடலில் சகல வசதிகளுடன் ஒரு படகைக் கொடுத்து கூப்பிடு தூரத்தில் இருக்கும் ஒரு தீவுக்கு போகச் சொன்னால் என்னாகும்? கேட்ட மாத்திரத்திலேயே செத்து விடுவார்கள் பலர். பெரும்பாலானவர்கள் சொல்வது எனக்கு நீச்சல் தெரியாது என்பதாக இருக்கும். பலருக்கு இரண்டு கயிறுகளை முடிச்சுப் போட்டு உறுதியாக சேர்க்கக் கூட தெரியாது. ஒரு பொருளை பாதுகாப்பாக பேக் செய்யத் தெரியாதவர்கள் பலர். வீட்டில் பியூஸ் போய் அதைப் போடக் கூட அஞ்சி மின்வேலைக்காரரை எதிர்பார்த்திருப்பவர்கள் பலர். சிறு வேலைகளுக்கும் கூட, ஒரே ஒரு நட்டை இறுக்குவதற்குக் கூட அதற்கு ஒரு ஆளைத் தேடுபவர்கள் ஏராளம். எவ்வளவோ நேரம் இருந்தும் சிறு செயல்களைக் கூட முயற்சிக்காமல், ‘நூறு ரூபாய் கொடுத்தால் இதைச் செய்ய ஆளிருக்கிறது, நம் கையில் ஏன் கிரீஸ் கறையுடன் போராட வேண்டும்’ என்ற மனப்பாங்குடன் பெரும்பாலானவர்கள் உள்ளனர்.

மரம் ஏறுவது, நீச்சல், கயிறு கட்டி ஏறுவது, முடிச்சுப் போடுதல், மின்சாரம் பற்றிய நடைமுறைக் கல்வி போன்ற அத்தியாவசியமான விடயங்களில் பலருக்கு அறிவு கிடையாது. சொல்லப் போனால் தீயணைக்கும் வீரர்களுக்கு அளிக்கப்படும் பயிற்சிகளில் குறைந்த பட்சமாவது கல்வி பயிலும் மாணவர்களுக்கும் தரப்படுவது சிறந்தது. அதுதான் வாழ்க்கைக் கல்வி என்றாகும்.

நம்மைச் சொல்லிக் குற்றமில்லை. நம் கல்வி முறையும் வாழ்க்கை முறையும் அப்படி அமைந்து விட்டிருக்கின்றன.

19/08/2012

தனியார் தவறுகளுக்கு மக்கள் பணத்தைச் செலவிடும் அரசு.

Filed under: செய்தி விமர்சனம்,பொது — கிருமி @ 11:38 முப

ஓட்டப்பிடாரம், ஆக. 14: தூத்துக்குடி மாவட்டம், ஓட்டப்பிடாரம் அருகே தனியார் அனல் மின் நிலையத்தில் செவ்வாய்க்கிழமை ஏற்பட்ட தீ விபத்தில், 4 தொழிலாளர்கள் உயிரிழந்தனர். 5 பேருக்கு பலத்த காயம் ஏற்பட்டது. இறந்தவர்களின் குடும்பங்களுக்கு தலா ரூ.1 லட்சமும், பலத்த காயம் அடைந்தவர்களுக்கு தலா ரூ.25 ஆயிரமும், சாதாரண காயம் அடைந்தவர்களுக்கு ரூ.10 ஆயிரமும் முதல்வரின் பொது நிவாரண நிதியில் இருந்து வழங்க உத்தரவிட்டுள்ளதாகமுதல்வர் ஜெயலலிதா தெரிவித்துள்ளார்.

சில கேள்விகள்.

விபத்துகளில் பாதிக்கப்பட்டோருக்கும் அவர்கள் குடும்பத்தினருக்கும் பண உதவி வழங்குவதை மனிதாபிமானமுள்ள எவரும் தவறென்று சொல்ல இயலாது.

ஆனால், ஒரு தனியார் நிறுவனத்தில் ஏற்படும் விபத்துக்கு அந்த தனியார் நிறுவனம் தானே பொறுப்பேற்க வேண்டும், அது தானே நடைமுறை, சட்டம்? விபத்துக்கு எந்திரக்கோளாறு காரணமா, மனிதத்தவறு காரணமா, சதி காரணமா, கவனக்குறைவு காரணமா என்றெல்லாம் ஆய்ந்து பார்க்கவேண்டாமா? அது அந்த தனியார் நிறுவனத்தின் தவறு என்றால் அரசினால் வழங்கப்பட்ட அந்த தொகை தனியார் நிறுவனத்திடம் அல்லவா வசூலிக்கப்பட வேண்டும்? அதாவது அரசு வழங்கும் உடனடி நிவாரணத்தொகையை அந்த நிறுவனம் பின்பு அரசுக்கு திரும்ப செலுத்துமாறு விதிமுறை ஏற்படுத்தப்பட்டிருக்க வேண்டுமே?

இது போன்ற விபத்துகளில் செய்தி வரும்போதே உதவித்தொகை வழங்கப்பட்டது என்ற செய்தியும் வருவது ஏன்?
மக்களிடம் நல்ல பெயர் எடுக்க வேண்டும் என்ற அரசுத்தலைமையின் ஆர்வம் மட்டுமே இதற்கு காரணமாக இருக்க முடியும். ஆனால் மக்களிடம் நல்ல பெயர் எடுக்க மக்கள் பணத்தை தனியாரின் தவறுகளை ஈடு செய்ய அரசு தயங்குவதே இல்லை. மக்களிடன் நற்பெயர் ஈட்ட தனியாரின் தவறுகளை பூசி மெழுக அரசு தயங்குவதில்லை.

இந்த நிலையில், வேலை வாங்கும் எந்த நிர்வாகமும் “அரசு ஒரு லட்சம் தந்து விட்டது, நானும் ஒரு லட்சம் தருகிறேன், வாயை மூடிக்கொண்டு போ” என்று சொல்லும். சாதாரணமாக இம்மாதிரி தொழிலாளிகள் மாதமொன்றுக்கு ஐந்தாயிரம் முதல் பத்தாயிரம் வரை ஈட்டுகிறார்கள். இந்த ஓரிரு லட்சம் என்பது அவர்களின் இரண்டு அல்லது மூன்று வருட சம்பாத்தியம், அவ்வளவு தான். இந்தப்பணம் அவர்களின் ஈமச்செலவு, கடன் தீர்க்க என்று செலவாகி ஓரிரு மாதங்களில் குடும்பம் வறுமையில் வாடும். அவர்களை நம்பி இருக்கும் குடும்பத்தின் கதி?

இம்மாதிரி விபத்துகளுக்கு பின் என்றாவது விபத்துக்கு காரணமானவர்களுக்கு தண்டனை வழங்கப்பட்டது என்றோ, அந்த நிறுவனத்தின் உரிமம் ரத்து செய்யப்பட்டது என்றோ செய்தி வந்திருக்கிறதா? வராது. தனியாரின் தவறுகளுக்கு பொறுப்பேற்பது போல் நட்ட ஈடு வழங்கும் அரசுகளிடம் அப்படிப்பட்ட நடவடிக்கைகளை எதிர்பார்க்கத்தான் இயலுமா?

17/08/2012

கருணாநிதியும் இணைய உலகமும்

Filed under: அரசியல்,செய்தி விமர்சனம் — கிருமி @ 11:56 பிப

குவிட்டோ, ஆக. 16: விக்கிலீக்ஸ் இணையதள நிறுவனர் ஜூலியன் அசாஞ்சேவைக் கைது செய்வதற்காக லண்டனில் உள்ள தங்கள் நாட்டுத் தூதரகத்தின் மீது தாக்குதல் நடத்தப் போவதாக பிரிட்டன் மிரட்டியதாக ஈக்வடார் குற்றம் சாட்டியுள்ளது.

என் அறிவுக்கு எட்டியவரை இது ஒரு நாடகம். அவர் பிரிட்டன் அரசிடம் மாட்டினால், சுவீடன் வழியாக அமெரிக்கா கொண்டு செல்லப்படுவார். ஈக்வடார் சென்றாலும் அங்கிருந்தும் அமெரிக்கா கொண்டு செல்லப்படுவார். இல்லாவிடில் நேரடியாக அமெரிக்கா அவர் இருக்கும் இடத்தில் விசாரிக்கும்.

வடகிழக்கு மாநிலத்தவர் மீது தாக்குதல் என்று குறுந்தகவல் மூலம் வதந்தி பரவியதால் மொத்தமாக குறுந்தகவல் அனுப்பும் வசதி 15 நாட்களுக்கு நிறுத்தப்பட்டது.

மொத்தமாக குறுந்தகவல் அனுப்பும் முறை எரிச்சலூட்டும் ஒரு செயல். நம் வீட்டு வாசலில் வீசப்படும் விளம்பர பிரசுரங்கள் போல நம்மைக் கேட்காமலே நம் செல்பேசியில் விளம்பரங்கள் வந்து குவியும். இதை நிரந்தரமாக நிறுத்தித் தொலைத்தால் நல்லது. 100 இலவசம் 1000 இலவசம் என்ற சலுகைகள் அறிவிக்கக் கூடாது என்று கட்டுப்பாடு கொண்டு வந்தாலும் நலம்.

சென்னை: டி.என்.பி.எஸ்.சி சார்பில் நடத்தப்பட்ட குரூப் 4 தேர்வு முடிவுகளை வெளியிட, சென்னை உயர்நீதிமன்றம் இடைக்காலத் தடை விதித்துள்ளது. தர்மபுரியைச் சேர்ந்த சின்னச்சாமி தொடர்ந்த வழக்கை விசாரித்த உயர்நீதிமன்றம், குரூப் 4 தேர்வு முடிவுகளை வெளியிட தடை விதித்துள்ளது. சின்னசாமி தாக்கல் செய்த மனுவில், தனது வினாத் தாளில் 200க்கு 195 கேள்விகள் மட்டுமே இருந்ததாகவும், இதனால் தனது அரசு வேலை உரிமை பறிக்கப்பட்டுள்ளதாகவும் குற்றம் சாட்டியுள்ளார். இதனையடுத்து வழக்கு தொடர்பாக விளக்கம் கேட்டு டி.என்.பி.எஸ்.சிக்கு உயர்நீதிமன்றம் நோட்டீஸ் அனுப்பியுள்ளது.

இது வரை நடந்த அனைத்து தேர்வுகளிலும் பல குளறுபடிகள், முறைகேடுகள் நடந்துள்ளன. இவர் ஏதோ கொஞ்சம் விவரம் தெரிந்தவர், வசதி உள்ளவர் போலிருக்கிறது. நீதிமன்றம் வரை சென்று விட்டார். எத்தனை பேர் என்ன செய்வது என்று தெரியாமல் மனம் குமுறிக் கொண்டிரருந்தார்களோ பாவம்! இறுதியாக நடந்த 4 தேர்வுகளையும் ரத்து செய்து விட்டு மறு தேர்தல் நடத்த வேண்டும். நேர்காணல் முறையையும் ஒழித்து விட்டு தேவைப்பட்டால் இன்னொரு அரைமணி நேரத் தேர்வு வைத்து உயர் பணிகளுக்கு தேர்வு செய்யலாம். நேர்காணல் என்பது ஊழலுக்கான திறந்தவெளி அழைப்பிதழ்.

கருணாநிதி இணையதளம் துவங்கினார்.

போய்ப் பார்த்தேன். “உள்ளத்தோடு ஒன்றிக்கலவாத எந்தப் பணியும் நிரவப்படாத பள்ளமாகத்தான் கிடக்கும்”னு போட்டிருக்குது.
“ஆமா அந்த விரவப்படாத பள்ளம் அந்த கிரானைட் குவாரி அளவுக்கு இருக்குமா?”
இந்த பொன்மொழி(?) உதிர்த்தவர் டாக்டர் கலைஞராம். மேற்படி தளம் இன்னும் ஆயத்தமே ஆகவில்லை, இது ஒரு பக்கம் மட்டும்தான் உள்ளது. இதற்குத்தான் இந்த ஆர்ப்பாட்டமா? கருமம். எனக்குத் தெரிந்து நம் நாட்டில் தான் அரசியல்வாதிகளைப் பெயரிட்டு அழைக்காமல் ஒரு அடைமொழியைக் கொடுத்து அதற்கும் முன் டாக்டர் போன்ற இற்றுப் போன பீற்றல்களைப் போட்டு விளிப்பது நடக்கிறது. (டாக்டர் புரட்சித்தலைவி, டாக்டர் கலைஞர்). தட்சிணாமூர்த்தியை கருணாநிதி என்று தமிழ்ப்படுத்தும்போது கருணாநிதி என்பது தமிழல்ல என்று கூடத் தெரியாத ஒருவரை தமிழகத்தில் ஒரு கூட்டம் மூதறிஞர், முத்தமிழ் வித்தகர், தமிழினக் காவலர் என்றெல்லாம் கூறிப் பிதற்றுகிறது. எல்லாம் காலத்தின் கோலம்!

15/08/2012

முகநூலும் கருணாநிதியும்

Filed under: அரசியல்,செய்தி விமர்சனம் — கிருமி @ 2:28 பிப

சென்னை, ஆக., 15: சுதந்திர தினமான இன்று முதல் இளைய தலைமுறையினர் அதிக அளவில் ஆர்வமுடன் பயன்படுத்தும் சமூக வலைதளங்களான ‘Twitter’ – ‘facebook’ ஆகியவற்றில் கருணாநிதி பெயரில் கணக்கும் புதிய வலைப்பக்கமும் உருவாக்கப்பட்டுள்ளன.

உருப்பட்டா மாதிரி தான்! இனி இங்கயும் அழும்பு பண்ணுவாரே? ஒரு வேளை டிவிட்டர், பேஸ்புக், கூகுள் எல்லாத்தையும் விலை பேசி வாங்கிட்டாங்களோன்னு எனக்கு ஐயமாத்தான் இருக்கு. வாய்ப்பு இருக்கு. இவங்க கால் பதிச்சு குழப்பாத குட்டையா? இன்டர்னெட்டை முடக்கு இறைவா, நாங்கள் பழையபடி புறா, தந்தி, தபால் முறைகளைப் பின்பற்றிக் கொள்கிறோம்.

சென்னை, ஆக.15: டெசோவின் அடுத்த மாநாட்டை தென் அமெரிக்காவில் நடத்த திமுக திட்டமிட்டுள்ளதாகத் தகவல்கள் வெளியாகியுள்ளன.

சே. என்ன ஒரு கீழ்த்தரமான அரசியல்! கடைத்தர அரசியல்வாதிகள் இப்படி ஒரு இனத்தையே சீரழித்து விட்டார்களே!

பெரம்பலூர், ஆக. 15: பெரம்பலூர் தனலட்சுமி சீனிவாசன் மெட்ரிக் மேல்நிலைப்பள்ளி மாணவ, மாணவிகள் 1,350 ச.மீ. பரப்பளவில் உப்பால் தேசியக்கொடி வடிவமைத்து, செவ்வாய்க்கிழமை உலக சாதனை படைத்தனர்.

இதில் என்ன உலக சாதனை, பெருமைப்பட என்ன இருக்கிறது என்று புரியவில்லை. பணம் இருப்பவன் என்ன வேண்டுமானாலும் செய்யலாம் என்ற நிலை உள்ள உலகில் இதெல்லாம் சாதனையா என்று ஏமாற்றமாக இருக்கிறது. கோடிக்கணக்கில் பணம் இருப்பவருக்கு பத்து பள்ளிகளும் நான்கைந்து கல்லூரிகளும் இருக்கத்தான் செய்யும். கூப்பிட்ட குரலுக்கு மாணவர்கள் வந்து என்ன சொன்னாலும் செய்கிறார்கள் என்பதற்காக ஒரு தூறலில் கரைந்து விடக் கூடிய ஒரு சித்திரத்தை உருவாக்குவது பெருமையா?

இன்னும் பொருளற்ற கூத்துகள் உலகம் முழுவது நடந்து கொண்டு தான் இருக்கின்றன, சாதனைகள் என்ற பெயரில். ஆயிரக்கணக்கில் ஒரே நேரத்தில் வாய் கொப்புளித்தல், சவரம் செய்தல் என்று கிறுக்குத்தனங்கள் பலவிதம், அதில் இது ஒரு விதம்.

14/08/2012

தமிழக அரசு இணைய தளங்கள் தனியார் கையில்!

டி.என்.பி.எஸ்.சி. இணையதளம் முழுவதும் ஆங்கிலத்திலேயே இருக்கிறதே. சரி தமிழ் வடிவம் என்று உள்ளதே அதை சொடுக்குவோம் என்று சொடுக்கினால் http://www.concerninfotech.com/tnpsc/tamilversion/index.html என்று ஏதோ ஒரு தனியார் நிறுவனத்தின் தளத்தின் (ஹோஸ்டிங்) கணக்கிலுள்ள ஒரு ஃபோல்டருக்கு செல்கிறது. தமிழ் தளம் முழுவதும் அந்த தனியார் நிறுவனத்தின் வெப்முகவரியிலிருந்தே இயங்குகிறது. இதை விட கேவலம் என்ன இருக்க முடியும்?

தளத்தை தனியார் தான் நிர்வாகம் செய்கிறார்கள் போலிருக்கிறது. இவ்வளவு பெரிய அரசு இயந்திரம் இருந்தென்ன பயன், அரசின் முக்கியமான இணையதளங்களைக் கூட அரசினால் பராமரிக்க இயலவில்லை, வெட்கக்கேடு.

அனைத்து அதிகாரபூர்வமான இணையதளங்களையும் நடுவண் அரசின் நேஷனல் இன்ஃபர்மேட்டிக்ஸ் மையம் தான் பராமரித்து வருவதாக இதுவரை எண்ணியிருந்தேன். ஆனால் நிலை அதுவல்ல போலும்.

இப்படி தனியாரிடம் இணையதளங்களை விட்டு வைத்தால் எவ்வளவோ தகவல் திருட்டுகள் நடக்க வாய்ப்பிருக்கிறது.
ஒரு சிறு உதாரணம். சுமார் 12 லட்சம் பேர் குரூப் 4 தேர்வு எழுதினார்கள், அவர்களின் முழு முகவரி, மின்னஞ்சல் முகவரி அனைத்தும் இம்மி பிசகாமல் எடுத்து அந்த தகவல்தொகுப்பை (data) விற்கலாம். மேலும் இந்த விவரங்கள் துல்லியமானவை. இந்த முகவரிகள் எத்தனையோ பேருக்கு பயன்படும். தேர்வுகளுக்கு பயிற்சி அளிக்கும் புற்றீசல் பயிற்சிப்பள்ளிகளுக்கு இவை அல்வா போல.

வேலையற்ற பட்டதாரிகளை இனங்கண்டு டி.என்.பி.எஸ்.சி. தரகர்கள் போல யாராவது அவர்களை அணுகி பேரம் பேசி ஏமாற்றவும் கூட இது பயன்படும். காலம் கடந்த பின் தான் நம் அரசுகளுக்கு அறிவு வரும் போல.

டி.என்.பி.எஸ்.சி முறைகேடுகள்

Filed under: பொது — கிருமி @ 12:53 பிப

http://www.dinamani.com/edition/story.aspx?&SectionName=Editorial&artid=644083&SectionID=132&MainSectionID=132&SEO=&Title=

// வினாத்தாள் தயாரிப்போரை சில மணி நேரங்களுக்கு முன்னதாகத் தேர்வாணையத்துக்கு வரச் செய்து, வழக்கத்தைவிட மூன்று மடங்கு அதிகமான கேள்விகளைத் தயாரித்து, கடைசி ஒரு மணி நேரத்தில் வேறொரு குழு அந்தக் கேள்விகளையும் வடிகட்டி, சரியாக 100 மதிப்பெண்களுக்கு நேர்ப்படுத்திய பின்னர், தேர்வுக்கு நடப்பதற்குப் பத்து நிமிடங்களுக்கு முன்பாக இணையத்தின் மூலம் 114 மையங்களுக்கும் அனுப்பி வைப்பது மிகமிக எளிது. //

மிக எளிது போல் தோன்றும் இந்த செயலில் உள்ள சிக்கல்கள் என்ன?

டி.என்.பி.எஸ்.சி.யின் திட்டப்படி கேள்விகள் மொத்தம் 200, மதிப்பெண்கள் 300. ஒரு கேள்விக்கு ஒன்றரை மதிப்பெண் ஆகும். பொதுத்தமிழில் அல்லது ஆங்கிலத்திலிருந்து 100 கேள்விகளும் பொது அறிவு, கணிதம், அறிவியல் போன்றவற்றிலிருந்து 100 கேள்விகளும் இருக்கும்.

ஆக மொத்தம் 200 கேள்விகள் உடையது ஒரு வினாத்தாள், இது ஒரு புத்தக வடிவில் இருக்கும். சுமாராக 50 முதல் 70 பக்கம் வரை வரும். குரூப் 4 தேர்வின் வினாத்தாள் சுமார் 74 பக்கம் உடையது. எவ்வளவு நவீன போட்டோகாப்பி (ஜெராக்ஸ்) எந்திரம் வைத்து அடித்தாலும் அதை அச்சடிக்க எவ்வளவு நேரமாகும் என்று சிந்தியுங்கள். ஒரு தேர்வு மையத்தில் குறைந்தது 600 பேர் தேர்வெழுதுகின்றனர். பெரு நகரங்களில் ஆயிரக்கணக்கில் ஒரு மையத்தில் எழுதுவார்கள். அனைத்து மையங்களிலும் நகல் எந்திரத்தை தற்காலிகமாக ஏற்பாடு செய்ய வேண்டும். அதற்கு கண்டிப்பாக ஒரு மாற்று எந்திரம் (ஸ்பேர்) வேண்டும், தடையில்லா மின் வசதி ஏற்படுத்த வேண்டும். அதற்கான இணைய இணைப்பு போன்ற தொழில் நுட்ப வசதிகளை அந்த மையம் கொண்டிருக்க வேண்டும். உதாரணமாக பல இடங்களில் அரசுப் பள்ளிகளில், சிறிய ஊர்களில் கூட தேர்வு நடைபெறுகிறது. மின் தடை உள்ளிட்ட பல குறுக்கீடுகள் வரும்,

நிற்க. உண்மையில் கேள்வித்தாள்கள் எப்படி தயாரிக்கப்படுகின்றன என்று அந்த கேள்வித்தாள்களை சற்று ஊன்றிப் பார்த்தால் தெரிந்து விடும்.

என் கணிப்புப்படி…

பலர் கேள்வித்தாள்களை தயாரிக்கின்றனர். கேள்விகளைத் தயாரிக்கின்றனர்.
கேள்விகள் 200 கேள்விகள் கொண்ட தொகுப்பாக தொகுக்கப்படும். ஒவ்வொரு தொகுப்பும் ஒரு வினாத்தாள் தொகுப்பாகிறது. அவற்றுக்கு குறியீட்டு எண் (SSGY, ASIA, SFT2 என்று) வழங்கப்படுகிறது. இப்படி பற்பல தொகுப்புகள் இருக்கும். இவற்றில் ஏதாவது ஒன்று (ஒரு குறிப்பிட்ட முறையில் அல்லது Random முறையில்) தேர்ந்தெடுக்கப்பட்டு தேர்வுக்கு ஒரு சில நாட்கள் முன்னதாக இவை அனுப்பப்படுகின்றன.

இங்கு முறைகேடு எப்படி நடக்கும் என்று யோசியுங்கள்.

விடைத்தாள்களைத் தொகுப்பவர்களிடம் உறுதியாக அவற்றின் மற்றொரு பிரதி இருக்கும். என்னதான் 200 கேள்விகள் என்றாலும் அவற்றின் பெரும்பாலான கேள்விகளை (அல்லது விடைகளை) மனதில் பதித்துக் கொண்டு வீட்டுக்குச் சென்று ஒரு தொகுப்பினை அந்த ஊழியரால் எளிதில் உருவாக்கிட இயலும். இது போதாதா? மேலும் ஒரு குறிப்பிட்ட தேர்வுக்கு SSGY என்ற குறியீடு கொண்ட ஒரு வினாத்தாள் தொகுப்பு செல்கிறது என்ற தகவலானது அனுப்பப்படும் இடத்திலிருந்து ஒரு ஊழியரால் (அவர் கடை நிலை ஊழியராகவும் இருக்கலாம்) விடைத்தாள் தொகுத்தவருக்கு கடத்தப்படுவது ஒன்றே போதும். வினாக்களோ விடைகளோ கசிந்து விடும்.

அல்லது தினமணி குறிப்பிட்டபடி அச்சடிக்கும் இடத்திலிருந்து செல்போன் போன்ற சாதாரண கருவிகள் மூலம் நகல் எடுக்கப்பட்டோ கையால் எழுதப்பட்டோ கூட போகலாம். திருடுபவருக்கு ஆயிரம் வழிகள்.

இன்னொரு விடயம். கேள்விகள் பொதுவாக ஏற்கனவே நடந்த தேர்வுத் தொகுப்புகளிலிருந்தே பெருமளவு உருவப்படுகின்றன. இதை வைத்து தேர்வுக்கு பயிற்சி நடத்தும் மையங்களும், தேர்வுத்தாள் மற்றும் வினா விடைத் தொகுப்பை வெளியிடும் பதிப்பாளர்களும் அடிக்கும் கொள்ளை சொல்லி மாளாது.

இப்பதிப்பாளர்கள் வெளியிடும் வினா விடைத் தொகுப்பு புத்தகங்களில் இருக்கும் எழுத்து, பொருட் பிழைகளைப் பார்த்தால் படு கேவலமாக இருக்கும். சொந்தமாக டி.என்.பி.எஸ்.சி. கேள்விகளை புதிதாகத் தயாரித்தால் இக்கேடுகளுக்கு ஒரு முற்றுப் புள்ளி விழும்.

இதெல்லாம் இருக்கட்டும் கடந்த 07-07-2012 இல் நடந்த குரூப் 4 தேர்வு சுமார் 10700 பணியிடங்களுக்கானது. மேலும் இத்துடன் குரூப் 8 தேர்வுகளுக்கும் தேர்வு நடந்தது. 04-08-2012 அன்று CSSE-II தேர்வும் நடந்தது. அனைத்திலும் கண்டிப்பாக முறைகேடுகள் நடந்திருக்கிறது. ஆனால் வெளி வரவில்லை. இதையும் ரத்து செய்து விட்டு நடத்தினால் தான் சிறப்பு. குரூப் 2 தேர்வு மோசடியில் பிடிபட்டவர்களை விசாரித்தால் இதன் முன் நடந்த முறைகேடுகள் பற்றி தெரிய வராமல் இருக்காது. ஆனால் பழிக்கும் விமர்சனங்களுக்கும் பயந்து அரசு அவற்றை மூடி மறைக்க முயன்றால் அது தமிழக இளைஞர்களின் தீவினை என்று தான் நோக வேண்டும்.

« முன்னைய பக்கம்அடுத்த பக்கம் »

வேர்ட்பிரஸ்.காம் இல் வலைப்பதிவு.

%d bloggers like this: